Zekarià 12

Ty entañe nitsarae’Iehovà am’Israele: Hoe t’Iehovà namelatse o likerañeo, naho nampijadoñe o mananta’ty tane toio vaho mitsene ty arofo’ondaty ama’e ao: Inao, te hanoeko fitovim-pivembèñañe t’Ierosalaime naho o mañohok’aze iabio, vaho hampitraofe’iareo ama’Ierosalaime t’Iehodà, naho harikatohe’iareo. Ie amy andro zay, le hanoeko vato fijinie’ze kila ondaty t’Ierosalaime; ho fonga fere-boboke ze mivave aze; vaho hene hitontoñe hiatreatre aze ze fifehea’ty tane toy. Amy andro zay, hoe t’Iehovà le ho paoheko ho tangòke o soavalao, naho ho seretse i mpiningi’ey; hanoka-maso amy anjomba’Iehoday iraho vaho ho lafaeko ho goa iaby ze soavala’ondaty. Le hitsakore añ’arofo ao o mpifehe’Iehodao hanao ty hoe: Haozarako o mpimone’Ierosalaime añam’Iehovà’i Màroy, Andrianañahare’iareo. Hanoeko sadròn’afo añivon-katae ao o mpiaolo’Iehodao, naho hoe failon’afo añivom-pitoboroñan’ampemba ao; ie hamorototo ondaty iaby mañohokeo mb’ankavana naho havia; fe ho fimoneñañe an-toe’e eo indraike t’Ierosalaime, Eka e Ierosalaime ao. Ho rombahe’Iehovà heike o kiboho’Iehodao, soa tsy hitoabotse ambone’Iehodà ty enge’i anjomba’i Davidey9 naho ty enge’o mpimone’Ierosalaimeo. Harova’Iehovà amy andro zay o mpimone’Ierosalaimeo le ho hambañe amy Davide ty mikoletra am’iereo amy andro zay; vaho hanahak’an’Andrianañahare ty anjomba’i Davide, hambañ’amy anjeli’Iehovà aolo’iareoy. Ie amy andro zay, ho paiako harotsake ze hene fifeheañe maname Ierosalaime. Le hakofòko amy anjomba’i Davidey naho amo mpimone’Ierosalaimeo ty arofom-patarihañe naho fisolohoañe; le hisamb’ahy iereo, i trinofa’iareoy vaho hirovetse, manahake t’ie fangololoiham-bako-tokañe, ho afero am’iareo manahake t’ie nitañoloñoloña’e. Ie amy andro zay, le ho fandalàm-bey ty e Ierosalaime ao, manahake ty firoveta’i Hadadrimone am-bavatane’i Megidone eo. Handala i taney, le songa hivike ze hene fifokoañe; hivike ty anjomba’i Davide naho hivike o rakemba’eo; hivike ty anjomba’i Natane naho hivike o rakemba’eo; hivike ty anjomba’i Levý naho hivike o rakemba’eo; hivike o nte-Simeio naho hivikeo rakemba’eo; sambe hivike ze hene fifokoa sehanga’e naho hivike ka o tañanjomba’eo.

Unseren Newsletter abonnieren

Église Locale installieren