Mpizaka 8

Le hoe o nte-Efraimeo ama’e, Ino o nanoe’o anay t’ie tsy kinanji’o, ihe nionjomb’eo hialy amy Midiane? Le nitrevohe’iareo an-keloke. Le hoe ty natoi’e, Ino ty nanoeko, te amy nanoe’oy? Tsy lombolombo te amo valòbo’i Abiezereo hao ty fitsindroham-bahe’i Efraime? Ie fa natolon’Añahare am-pità’areo i roandria’i Midiane rey: t’i Orebe naho i Zeèbe? Aa le ino ty nilefeko mandikoatse i anahareoy? Niketrak’amy zao ty haviñera’iareo amy saontsi’ey. Nomb’am-pitsaha’Iordaney mb’eo t’i Gidone le nitsake, ie rekets’indaty telon-jato rey, nidazidazitse f’ie mbe nañoridañe avao. Le hoe re amo nte-Sokoteo, Anjotso boko-mofo i lia-raike mañorik’ahiy, fa mikolempañe hañoridaña’ay i Zebake naho i Tsalmonà, mpanjaka’i Midiane. Le hoe o roandria’i Sokoteo: Am-pità’o hao ty fità’i Zebàke naho i Tsalmonà hamahana’ay mofo o lahin-defo’oo? Le hoe t’i Gidone, Aa ie fa natolo’Iehovà an-tañako t’i Zebàke naho i Tsalmonà, le ho riateko am-patin-kivoke naho ropiteke ty nofo’areo. Boak’ao re nionjomb’e Penoele mb’eo le nahere’e am’iereo i saontsiy; vaho nanoiñe aze manahake i natoi’o lahilahi’i Sokoteoy. Aa le hoe ty asa’e amo lahilahi’i Penoeleo: Ie mibalik’atoy am-panintsiñañe, le harotsako o fitalakesañ’aboo. Ie amy zao, te Karkore añe reketse lahin-defoñe va’e rai-ale-tsi-lime-arivo t’i Zebake naho i Tsalmonà. Izay ty nisisa’i lia-rain-tatiñanañey, fa nikoromak’an-kotakotak’ao ty lahindefo rai-hetse-tsi-ro’ale. Aa le nionjomb’amy Lalam-Pimoneñ’an-Kibohotsey t’i Gidone, atiñana’i Nobà naho Iogbehà, vaho linafa’e i lia-raikey, amy te nierañerañe avao i firimboñañey. Nilay añe t’i Zebake naho i Tsalmonà fe hinorida’iereo naho tsinepake i mpanjaka roe rey, i Zebake naho i Tsalmonà, vaho navalitsikota’e i valobohòkey. Nibalik’amy hotakotakey t’i Gidone, ana’Ioase aolo’ty fanjiriha’i àndroy, le tsinepa’e ty ajalahy boak’amo nte-Sokoteo nañontane aze naho nampandrendreha’e o roandria’i Sokote naho o talè’eo, ondaty fitompolo-fito’amby. Nivotrak’am’ondati’i Sokoteo re, nanao ty hoe: Ingo t’i Zebake naho i Tsalmonà, o nañendaha’areo ahio ami’ty hoe: am-pità’o hao ty fità’i Zebake naho i Tsalmonà hamahana’ay ondati’o màmakeo? Aa le nendese’e o roandria’i rovaio, miharo fatike naho ropiteke vaho nanare’e amy rezay o lahilahi’i Sokoteo. Finofopòfo’e ka ty fitalakesañ’abo’i Penoele vaho navetra’e o lahilahi’i rovaio. Le hoe re amy Zebake naho i Tsalmonà: Akore v’ondaty vinono’areo e Taboreo? Le hoe ty toi’iareo: Nihambañe ama’o iereo, vintañe raik’amo anam-panjakao. Le hoe re, Nilongoko iereo, anan-dreneko; amy te veloñe t’Iehovà, naho rinomba’areo veloñe iereo le tsy ho vinonoko nahareo. Le hoe ty asa’e am’Ietère tañoloñoloña’e: Miongaha vonò. Fe tsy nakare’i ajalahiy ty fibara’e; amy t’ie nihembañe fa mbe tòra’e. Le hoe t’i Zebake naho i Tsalmonà, Miongaha le miambotraha ama’ay fa mira ami’ty lahilahy ty haozara’e. Aa le nitroatse t’i Gidone naho vinono’e t’i Zebake naho i Tsalmone vaho rinambe’e o saren-jirim-bolañe am-bozon-drameva’iareoo. Le hoe o ana’Israeleo amy Gidone: Mifehea anay, ihe naho i ana’oy, naho ty anan’ana’o; fa rinomba’o am-pità’i Midiane. Hoe ty natoi’i Gidone: Tsy ho feleheko, naho tsy ho fehe’o anakoo, fa ho fehe’Iehovà. Le hoe t’i Gidone am’iereo, Mihalaly ama’areo iraho te songa hanolotse ahy o bangen-tsofiñe nikoahe’eo. (Toe nivolamena o bangen-tsofi’iareoo amy t’ie nte Ismaele.) Le hoe ty natoi’iareo, Hatolo’ay an-joton-troke; Nalafi’iareo eo amy zao ty lamba vaho songa nampipoke o bange kinopa’eo ze lahilahy. Arivo tsy fiton-jato sekele ty lanja’o bange volamena nihalalie’eo, tsy añate’izay o bange naho firavake vaho saroñe malo-mavo tamy mpanjaka’i Midiane reio, le tsy tama’e ka o silisily nandravake ty vozon-drameva’eo. Nitsene efode ama’e t’i Gidone naho nitana’e e Ofrà, an-drova’e ao naho fonga nanao hakarapiloañe ama’e amy toetsey t’Israele; ie ni-fandrik’amy Gidone naho amy hasavereña’ey. Aa le nampiambanèñe añatrefa’o ana’Israeleo t’i Midiane tsy nahafiandra ty añambone’e ka. Nitofa efa-polo taoñe faha’i Gidone i taney. Aa le nisitake t’I erobaale ana’Ioase, nimoneñe añ’anjomba’e ao. Nahatoly anadahy fitompolo am-bata’e t’i Gidone, fa nimaro ty vali’e. Nisamak’ana-dahy ho aze ka i sakeza’e e Sekeme añey, le natao’e Abimeleke ty añara’e. Nivilasy am-pahantera’e soa t’i Gidone ana’Ioase, vaho nalentek’an-kibori’Ioase rae’e, e Ofrà’o nte-Abiezereo. Aa ie nihomake t’i Gidone le nandifike mb’amo Baaleo indraike o ana’Israeleo, vaho nanoe’iareo ho ‘ndrahare’iareo ty Baale-berite. Le tsy nitiahi’o ana’Israeleo t’Iehovà Andrianañahare’iareo nandrombake iareo am-pità’o rafelahi’iareo niariseho iareo mb’etiam-beroañeo; mbore tsy nanoe’iereo vali-kare ty anjomba’Ierobaale, toe i Gidone, ty amy ze hene soa nanoe’e e Israeleo.

Unseren Newsletter abonnieren

Église Locale installieren