Mikà 6

Janjiño henaneo ty nafè’Iehovà: Miongaha, aboaho amo vohitseo o enta’oo, ampitsanoño o haboañeo ty fiarañanaña’o. Mitsendreña ry vohitseo, ty sisì’Iehovà, ry manantañe maoza’ty tane toio, fa manan-kabò am’ondati’eo t’Iehovà, ie toe hifanjomotse am’Israele. O ry ondatikoo, ino ty nanoako azo? Akore ty nahamokorako azo? Atalilio. Izaho nañakatse azo an-tane Mitsraime añe, nijebañ’azo an-trañom-pañondevozañe, le nampiaoloeko azo t’i Mosè naho i Aharone vaho i Miriame. O ry ondatikoo, tiahio henaneo i nikinià’i Balake mpanjaka’i Moabey, naho ty natoi’i Balame ana’i Beore aze boake Sitime pake Gilgale, hahafohina’areo o sata-vanta’Iehovà o. Akore ty hiatrefako Iehovà? ty hiambaneako aman’Añahare Andindimoneñey? Hiatrefako an-tsoron-koroañe hao, an-temboay hao? Ho no’Iehovà hao t’ie kobatròk’arivo? ndra torahañe rai-ale mikararàke menake? hatoloko hao ty tañoloñoloñako ty amy fiolàkoy? ty vokan-troko ty amo hakeom-piaikoo? Fa natoro azo, ry koahe, ty hasoa, naho ty ipaia’Iehovà: te hanoe’o ty hiti’e, t’ie ho tea fiferenaiñañe, vaho hirè-batañe hindreza’o fañavelo aman’Añahare’o. Mikoik’amy rovay ty fiarañanaña’Iehovà, hañaoñe ty tahina’o ty mahihitse. Janjiño i Kobaiñey, naho i nanendre azey. Mbe amam-baran-katsivokarañe hao ty añ’akiba’i lo-tserekey? naho i kapoa-tomotse tìvay. Ho volilien-ko hiringiri’e hao raho t’ie amam-balantsy vìlañe, naho amam-batom-pamañahiañe an-koroñe ao? Ie pea katramo o mpañalealeo, naho mivolam-bande o mpimone’eo, vaho mamañahy am-bava’e ao ty lela’iareo. Aa le ho silòfeko irehe, ho zevoñeko ambane, hampibangìñ’azo ty amo tahi’o maroo. Hikama irehe fa tsy ho anjañe; hasalikoañe mampikoritoke ty an-tro’o ao; hanao an-driha irehe fa tsy hahafihaja, vaho hatoloko ami’ty fibara ze nakafi’o. Hitongy irehe fe tsy hanatake; handia olive fe tsy hihosotse amy menakey; naho hampipiritse valoboke, fe tsy hinome’o ty divai’e. Nitambozora’areo o fañè’i Omrio; naho nitàñ’o sata’i Akabeo, naho nañavelo amo fisafiri’iareoo; aa le hampangoakoaheko irehe, hampikosihañe o mpimoneñeo, le ho vavè’areo ty inje’ondatikoo.

Unseren Newsletter abonnieren

Église Locale installieren