Iekezkèle 11

Nonjone’i Tiokey iraho vaho nente’e niakatse mb’an-dalambey atiñana’i anjomba’Iehovày miatreke maniñanañe; le ingo am-pimoahañe i lalambeiy t’indaty roapolo-lim’amby; tama’e ao Iaazanià ana’i Azore naho i Pelatià ana’i Benaià, roandria’ondatio. Le hoe re amako, O ana’ondatio, iretoañe o mpikitro-draha raty naho mpanoro heve-kaloloañe ami’ty rova toio, ie manao ty hoe: Tsy marine antika ze o fandranjiañe anjomba zao; etoañe i valàñey, itika ro hena’e. Aa le itokio, mitokia ry ana’ondatio. Nivotrak’amako amy zao i Arofo’Iehovà y nanao ty hoe, Isaontsio ty hoe: Hoe t’Iehovà, Fa nanoa’areo ty hoe ry anjomba’Israele, amy te apotako o raha mizilik’am-pitsakorea’areoo. Fa nampitomboe’areo ty zinamañe an-drova atoy, vaho nitsitsife’areo lolo o lalañeo. Aa le hoe ty nafè’Iehovà Talè; O zinamañe nirohote’areo an-damoko, ie ty nofo’e, le i rovay ty valàñe fe hakareko boak’ao nahareo. Irevendreveña’areo i fibaray, aa le ty fibara ty hampombàko mb’ama’areo, hoe t’Iehovà Talè. Ie hakareko boak’ao le haseseko am-pitàn-ambahiny naho hampijadoñeko zaka. Hampikorovohe’ty fibara, ho zakaeko añ’olo’Israele añe, hahafohina’areo te Izaho Iehovà. Tsy ho valàñe’areo ty rova toy, vaho tsy inahareo ty ho nofo’e am-po’e ao, fa tsy mete tsy zakaeko añ’olon-tane’Israele añe, vaho hapota’areo te Izaho Iehovà; ie tsy nañavelo amo fañèkoo, naho tsy nañorike o zakakoo, fa o fepèm-pifeheañe mañohokeo ty orihe’areo. Ie nitoky iraho le nihomake t’i Pelatià ana’i Benaià. Aa le nitoke an-tareheko, nipazake ty hoe: Hete! ry Iehovà Talè! hagadoñe hao ty sehanga’Israele? Le niheo amako ty tsara’Iehovà nanao ty hoe, O ana’ondatio, toe o longo’oo, eka o roahalahi’oo, o lahilahim-pifokoa’oo, vaho ze hene anjomba’Israele, ro nanoa’o mpimone’Ierosalaimeo ty hoe, Ihankaño t’Iehovà; fa natolots’anay ty tane toy ho fanaña’ay. Aa le ano ty hoe: Hoe ty nafè’Iehovà Talè, Ndra te nahifiko tsietoitane añe iereo, añivo’o kilakila ondatio ao, naho naparaitako amo fifeheañeo, mbe ho fitsoloha’iareo kede an-tane homba’iereo iraho. Aa le ano ty hoe, Hoe t’Iehovà Talè, hatontoko am’ondatio nahareo, naho havoriko boak’amo fifeheañe nampiparaitsahañe anahareoo, vaho hitolorako ty tane’Israele. Le homb’eo iereo, fonga hañondroke o haleora’eo naho o hativa’e ama’eo. Le ho tolorako arofo raike naho haziliko ama’areo ty arofo vao; naho hakareko amo nofo’iareoo ty troke gañe vaho ho tolorako arofo nofotse; hañaveloa’iareo amo fañèkoo naho hambena’iareo o fepèkoo, hañeneke irezay; le h’ondatiko iereo vaho ho Andrianañahare’iareo iraho. Fe ty amo mpañorike ty fisalalan’arofo’e mpilelalela o haleora’eo naho o hativa’eoo, le hondroheko an-doha’iareo ty sata’iareo, hoe t’Iehovà Talè. Ie amy zao, nonjone’i kerobe rey o ela’eo naho o larò mpirekets’ama’eo; vaho ambone’iareo eo ty engen’Andrianañahare’Israele, le nionjoñe boak’añivo’i rovay ty enge’Iehovà, nijohañe ankaboa’i vohitse atiñana’i rovay eñey. Modo izay le nongahe’i Tiokey iraho vaho nendeseñ’añ’aroñaroñe amy Tion’Añaharey mb’an-tane o nte-Kasdio mb’amo mpirohio mb’eo. Aa le niakatse amako nañambone mb’eo i aroñaroñe nitreakoy. Ie amy zay nataliliko amo mpirohio iaby o tsara naboa’Iehovà amakoo.

Unseren Newsletter abonnieren

Église Locale installieren