Hosèa 6

Hosèa 6

Antao, himpoly am’Iehovà tika; Ie ty nandrimitse, naho ie ty hampijangañe antika, Ie ty namofoke, naho ie ty hampidiañe antika. Afake roe andro le hampiveloma’e, amy andro fahateloy ro hampitroara’e, himoneñan-tika am-pivazohoa’e eo. Le hahafohiñe tika, naho himane hahafohiñe Iehovà; Mionjoñe re manahake ty manjirik’àndro; le hivotrak’amantika manahake o orañeo, i oram-pigadoñañey, naho i orañe aolo an-tane atoiy. Ry Efraime, ino ty hanoako ama’o? Ry Iehodà, ino ty hanoako azo? Hoe mika ty hasoa’o; mimeatse añe te maraindray manahake o misafononokeo. Aa le nihatsafeko amo mpitokio, nizamaneko am-pivolam-bavako; hoe fipelaran-kelatse ty fizakañ’azo. Toe fiferenaiñañe ty paiako, fa tsy soroñe; naho ty fahafohinañe an’Andrianañahare te amo engan-koroañeo. Fe manahake i Dame t’ie nivalike amy fañinay; izay ty niolà’iareo amako. Rova’o mpikitro-draha ratio t’i Gilade, tsitsike lian-dio. Hoe firimbo-malaso mivoñoñe ondaty, ty fañohofa’i fivorim-pisoroñey loza an-tevan-dala’i Sekème eo; toe haloloañe ty anoe’iereo; Naharendreke haleorañe añ’anjomba’Israele ao iraho; zoeñe e Efraime ao ty hatsimirirañe, naho naniva vatañe t’Israele. F’ie nifotoañeko san-kavokaran- drehe r’Iehodà, ie hampoliko ty fandrohizañe ondatikoo.

Unseren Newsletter abonnieren

Église Locale installieren