Timoty I 2

Timoty I 2

Ty añosihako valoha’e le te hanoeñe ho a ondaty iabio ty fihalaliañe, filolohañe, fañalañalañañe naho fañandriañañe, naho amo mpanjakao naho o fonga mpifeheo, hiveloman-tika am-pianjiñañe naho fanintsiñañe, mañambeñe Hake vaho migahiñe. Fa izay ty soa naho mete am-pivazohoan’Añahare Mpandrombak’antika, ie satri’e te ho hene tra-drombake ondatio hahatendreke ty faharendrehañe ty hatò. Raike t’i Andrianañahare, naho raike ty Mpañalañalañe añivon’Añahare naho ondatio, indaty atao Iesoà Norizañey, i nanolotse ty fañòva’e ho vilin’ai’ze he’ey, ho fitaliliañe an-tsa do’e. Izay ty nanendreañe ahy ho mpitaroñe naho Firàheñe—mivolan-katò iraho fa tsy mandañitse—ho mpañoke to naho migahiñe amo kilakila’ndatio. Aa le salalàeko te hene hitalaho ondatio ndra aia’aia am-pañonjoñam-pitàñe miavake, tsy an-kaboseke ndra lietse. Manahake izay, te hisaroñe ami’ty eva’e o rakembao, ho hendre naho tsò-po, tsy a-maròy mirandrañe tsy am-bolamena ndra hange, vaho tsy misikin-damba marerarera, fa mitolon-tsoa mañeva o rakemba manao ho mpitalaho aman’Añahareo. Ehe te hianjiñe naho hiandaly o rakembao t’ie mioke. Tsy meiko hañòke ndra hanan-dily ami’ty lahilahy ty rakemba, fa hianjiñe. Amy te namboareñe hey t’i Dame, vaho izay i Haova. Le tsy i Dame ty ni-fañahieñe, fa i rakembay ty finitake vaho nikorovoke an-kakeo. Ie amy zao, ho rombahen-dre amo fisamahañeo, ie milozoke am-patokisañe naho fikokoañe vaho fiavahañe mitrao-pilieram-batañe.

الاشتراك في نشرتنا الإخبارية

تثبيت Église Locale