Samoele II 6

Natonto’i Davide indraike ze hene jinoboñe amy Israele ao, telo ale. Niavotse amy zao t’i Davide rekets’i maro ama’e boake Baale-Iehoday hañakatse i vatam-pañinan’Añaharey boak’ao, i fikanjiañe ty tahina’Iehovà i Màroy, ie mimoneñe añatrefa’o kerobeo. Aa le najoñe an-tsarete vao i vatan’Añaharey naho nakare’iereo añ’anjomba’i Abinadabe e Gibà ao vaho nendese’i Ozà naho i Akiò ana’i Abinadabe i sarete vaoy. Toe nakare’iereo añ’anjomba’i Abinadabe e Gibà ao i vatam-pañinan’Añaharey vaho niaolo i vatam-pañinay t’i Akiò. Nitsinjake añatrefa’Iehovà t’i Davide naho i anjomba’Israele iabiy, am-pañarahañe ze karazan-draha titiheñe nanoeñe an-kazombatango, naho an-jejobory naho marovany naho fikorintsañe naho kantsàñe vaho fikoriñañe. Ie nivotrak’an-toem-pifofoha’i Nakone eo, le nitakare’i Ozà i vatam-pañinan’Añaharey amy t’ie hinetseketse’o katrakao. Aa le nisolebotse amy Ozà ty haviñera’Iehovà, naho zinevon’Añahare ty amy fandilara’ey, vaho nihomak’añ’ila’i vatam-pañinan’Añaharey eo. Nanahelo t’i Davide te finanto’Iehovà t’i Ozà, aa le natao’e ty hoe Peretsozà ty añara’i toetsey pake henaneo. Nirevendreveñe amy Iehovà t’i Davide henane zay le nanao ty hoe, Ami’ty akore ty hampombañe i vatam-pañina’Iehovà y mb’amako mb’etoa? le tsy nendese’i Davide mb’an-drova’i Davide mb’eo ty vatam-pañina’Iehovà fe navi’i Davide mb’añ’anjomba’i Ovededome, nte-Gate ao. Nitolom-pitobok’añ’anjomba’i Ovededome nte-Gate ao telo volañe i vatam-pañina’Iehovà y; le nitahie’Iehovà t’i Ovededome naho o añ’anjomba’e iabio. Natalily amy Davide mpanjaka ty hoe, Toe nitahie’Iehovà ty anjomba’i Ovededome naho ze ama’e ty amy vatam-pañinan’Añaharey. Aa le nimb’eo t’i Davide vaho nendese’e boak’añ’anjomba’i Ovededome ao pak’an-drova’i Davide an-kafaleañe i vatan’Añaharey. Ie amy zao, naho fa nandeha enen-dika o ninday i vatam-pañina’Iehovà io, le nisoroñe ty añombelahy naho ty bania vinondrake. Nitsinjak’añatrefa’Iehovà an-kaozara’e iaby t’i Davide, ie nisikiñe kitambe leny t’i Davide. Aa le nendese’i Davide naho ty anjomba’Israele iaby am-pipazapazahañe naho fipopohañe o tsifan’añondrio ty vatam-pañina’Iehovà. Ie nimoak’an-drova’i Davide ao ty vatam-pañina’Iehovà, le nitilihitse an-dalan-kede ty Mikale ana’i Saole naho niisa’e t’i Davide mpanjaka nitribatribake naho nitsinjak’añatrefa’Iehovà le nitorifihe’e an-tro’e. Aa le nazili’iereo i vatam-pañina’Iehovà y vaho napo’e an-toe’e añivo’i kivoho naore’i Davide ho azey le nisoroña’i Davide engan-koroañe naho engam-panintsiñañe añatrefa’Iehovà. Ie nihenefe’i Davide ty fisoroñañe o enga oroañeo naho o engam-panintsiñañeo le nitatae’e ondatio ami’ty tahina’Iehovà’i Màroy. Le hene nanjotsoa’e boko-mofo naho fatets-ena naho garatom-balòboke ondatio, i valobohò’Israeley, lahilahy naho rakemba; vaho nimpoly iaby ondatio, songa mb’añ’anjomba’e añe. Nimpoly ka t’i Davide hitata o añ’anjomba’eo. Le niakatse nifanalaka amy Davide t’i Mikale anak’ampela’i Saole, nanao ty hoe: Akore ty enge’i mpanjaka’Israeley anindroany, ie nañafa-tsaroñe aolo’maso’o anak’ampatam-pitoro’eo manahake ty fibongia’o tsivokatse tsy aman-keñatseo! Le hoe t’i Davide amy Mikale, Toe tañatrefa’Iehovà, ie nijoboñe ahy ambonen-drae’o naho ambone’i anjomba’e iabiy vaho noriza’e ho mpifelek’ondati’Iehovà o, hifehe Israele; Aa le hitsinjak’añatrefa’Iehovà iraho. Toe mbe ho losorako i hatsivokarakoy naho hireke ampahaisahako, fe o mpitoroñ’ampela nivolañe’oo, ie ro hiasy ahy. Toly ndra tsy nanañ’anake ampara’ty androm-pivetraha’e t’i Mikale anak’ampela’i Saole.

الاشتراك في نشرتنا الإخبارية

تثبيت Église Locale