Sabo 57

Sabo 57

Tretrezo iraho ry Andrianañahare, iferenaiño, fa Ihe ro fitsoloham-piaiko; eka! an-talinjon’ela’o ao ty fipalirako, ampara’te ihelaña’ty hankàñe. Kanjieko t’i Andrianañahare Abo-tia; Aman’Añahare fahatafeterako. Hahitri’e hirik’an-dikerañe ao ty fandrombahañe ahy, endaha’e i mandialia ahikoy. Selà Ho sangitrihen’Añahare ty fiferenaiña’e naho ty hatò’e. An-teñateñan-diona ao ty fiaiko; itraofako handre o mpikofòke afoo; toe o ana’ondatio, lefoñe naho ana-pale o famotsi’eo, fibara masioñe ty famele’iareo. Onjoneñe ambone’i likerañey irehe, ry Andrianañahare, ambone’ty tane toy iaby ty enge’o. Nikotepe’iareo harato o liakoo; mibokobokoke ty fiaiko; nihalia’iereo koboñe ty aoloko eo, f’ie nigodoñe am-po’e ao. Selà Mijadoñe ty troko ry Andrianañahare, eka, gañe ty troko; hisabo iraho, eka hisabo fandrengeañe. Mivañona, ry engeko! Mitroara ry kararàke naho marovany, hampitsekafako ty fanjirik’andro! Hañandriañe Azo iraho ry Talè añivo’ondatio eo, ho rengeko an-tsabo amo kilakila‘ndatio ao. Amy te ra’elahy pak’an-dindiñe añe ty fiferenaiña’o; le pak’an-drahoñe eñe ty hatò’o. Onjoneñe ambonen-dikerañ’eñe irehe ry Andrianañahare, ty enge’o ambone’ty tane bey toy.

الاشتراك في نشرتنا الإخبارية

تثبيت Église Locale