Iesaià 8

Le hoe t’Iehovà amako: Mandrambesa takelake bey vaho sokiro an-tsokitse lahi’e ty hoe: Malisa ty fikopake, masika ty tsindroke, le ho rambeseko ho amako ty valolombelo matoe hamolily, i Orià mpisoroñe naho i Zekarià ana’Ieberekiaho. Aa le nimb’amy rakemba mpitokiy iraho; niaren-dre vaho nisamak’ana-dahy. Le hoe t’Iehovà amako, Itokavo ty hoe Maher-salal-kas-baze, amy te aolo’ty aharendreha’i ajajay ty hikoike ty hoe ‘Raeko’naho ‘Reneko,’ le fa nasese’i mpanjaka’i Asorey añe ty vara’i Damesèke naho ty fikopahañe i Somerone. Nitsara amako indraike t’Iehovà nanao ty hoe: Kanao nitsambolitio’ondaty retiañe ty rano’i Siloake mitsiritsioke moray, vaho mirebeke amy Retsine naho ty ana’i Remaliaho; Inao arè te hampandipore’i Talè am’iareo ty rano’i Saka maozatse naho beiy: i mpanjaka’i Asorey amy ze hene enge’e; hanginahina amo talaha’e iabio, hitoabotse ambone’ze hene fitroara’e; Hifaoke mb’e Iehodà re, handopatse vaho hiranga mb’eo, Eka ho takare’e ty fititia; hibànatse hañatseke i tane’oy ami’ty fivela’o ela’eo, ry Imanoele. Mijeñajeñafa ry ondaty; Midemoha! Manolora ravembia, ry an-tsietoitane añe; miteveha sadia f’ie ho demoheñe; misadia fe ho demoheñe; Misafiria safiry, fe tsy hanjofake; mañotsohotso firefeañe, f’ie tsy hijadoñe fa ama’ay t’i Andrianañahare. Nametse amako t’Iehovà am-pità’e maozatse, nañeretse ahy tsy hanjotike ami’ty lala’ondaty retiañe, ami’ty hoe: Ko ano ty hoe: ‘Kilily,’ o raha iaby atao’ondaty retiañe ho fikililiañeo; ko hembañe’o ty fihembaña’iareo, le ko ihebakebaha’o. Hamasiño t’Iehovà’i Màroy, ie ty ihembaña’areo, ie ty añeveña’areo. Ho fitsolohañe re, fe ho vato fikotroforañe naho lamilamy fitsikapiañe amy anjomba roe’Israele rey; ho fandrike naho koboñe amo mpimoneñe e Ierosalaimeo. Hitotohitse ty maro, hikorovoke ho sèrañe, ho fandriheñe vaho ho tsepake. Vahoro i fañinay, liteo ho a o mpiamakoo ty fañòha’e. Le handiñe Iehovà iraho, I mañeta-daharañe amy anjomba’Iakobey: Ama’e ao ty fitamàko. Intoy iraho naho o anake natolo’Iehovà ahikoo! Viloñe naho halatsañe e Israele atoy boak’am’Iehovà’i Màroy, I mimoneñe am-Bohi-Tsioney. Ie sigihe’iereo ami’ty hoe: Ipaiao amo jinio naho amo doany miñeoñeoñe naho mitreontreoñeo; Aa tsy ho paiae’ondatio hao t’i Andrianañahare’e? Hantsaka fañahin-dolo hao o veloñeo? Mb’an-Kàke naho i fañinay! Naho tsy milahatse ami’ty tsara toy ty enta’iareo, le tsy nanjirihan’andro. Hiranga aze iereo, am-poheke naho hasalikoañe, aa ie milingoa, le ho boseke vaho hamatse i mpanjaka’iareoy naho ty’ndrahare’iareo. Aa ke hiandrandra iereo, hera hitolike an-tane, le haronje am-paloviloviañe naho am-pigodoñañe, an-kamoromoroñañe naho an-kaferenaiñañe vaho añ’ieñe ao. Ie amy zao, tsy ho an-kamoromoroñañe ao ka i naloviloviy; nimavoe’e ty tane’i Zebolone naho ty tane’i Naftale te taolo, fe honjone’e ty enge’e añ’andro añe, le hampilifore’e volonahetse ty an-dala’i riakey, alafe’Iordaneiy amy Galilà’o kilakila’ndatioy.

الاشتراك في نشرتنا الإخبارية

تثبيت Église Locale