Korinto II 8

Ie amy zao, ry longo, tea’ay ho fohi’areo ty falalàn’Añahare natolotse amo Fivory e Makedoniao, ndra t’ie mifeake haloviloviañe, le nandoparem-patarihañe ty haliforan-kaeha’iareo naho ty halosoran-karahara’iareo. Eka taroñeko ty fahalefea’iareoy, te nandikoatse ty oza’iareo, ie nanolotse an-tsatrin-troke; naho nihalaly ama’ay an-drakadrakake te hitraoke amy fiatrafañe o noro’eoy. Le nanoe’iereo, fe tsy ami’ty natao’ay ho mete, te mone nanolo-tsandry amy Talè heike iereo vaho ama’ay ty amy satrin’Añaharey. Aa le nosihe’ay t’i Titosy; ie fa namototse ro hañeneke ama’areo ka ty fanoloram-palalàñe toy. Aa, hambañe amy t’ie miraorao amy ze he’e—am-patokisañe naho tsara, an-kilala naho fahimbañañe, vaho amy fikokoa’areo anaiy—le milikoara amo falalàñe zao ka. Tsy ivolañako t’ie lily, fe ty amo fahimbaña’o ila’eoo, naho ty hamenteako ty fikokoa’areo. Fohi’areo ty fatariha’i Talèntika Iesoà Norizañey, ie ni-mpañaleale ro nirèke ho rarake ty ama’areo, soa te i hararaha’ey ro hampañarivo anahareo. Inao ty heveko ty amy rahay: Tombo’e ho anahareo te namototse amy taoñey, le tsy vaho nanao fa nisalalaeñe. Aa le henefo i fitoroñañey henaneo, soa te hambañe ami’ty falisà’areo hanao, ty hañenefa’areo amy ze lefe’areo; fa naho eo ty hasindàñe, le ho no’e ty amy hanaña’ondaty fa tsy ty amy tsy fanaña’e. Tsy te hampijinieñe ty ila’e le hamaivañeñe ty ila’e, fa t’ie hampitsahareñe; ie henaneo, ty havokara’areo ro ho amy ze paia’iareo, soa te ho amy ze paia’areo ka ty hanolora’iareo amo havokara’eo, vaho ho mira. Hoe ty pinatetse: Tsy nilosoreñe ty nanontoñe maro, le tsy niereñe ty nanontoñe kede. Andriañeñe t’i Andrianañahare, te nazili’e añ’arofo’i Titosy ao ty fahimbañañe ho anahareo hambañe ami’ty ahiko. Tsy vaho i halali’aiy ty ninò’e, fa amy hasindà’ey ty nihitrifa’e mb’ama’areo mb’eo an-tsatri’e, le nahitri’ay hitraok’ama’e ty rahalahy rengè’o hene Fivorio ty amy talili-soay; Tsy izay avao, fa tinendre’o Fivorio t’ie hindre lia ama’ay amo falalàñe zao, o vandroñe’aio ho ami’ty enge’i Talè naho hampidodea ty hatsotseha’ay hañimba; ie mitao tsy ho tiñeñe amy famandroña’ay o ravoravo jabajaba zaoy, fa anolora’ay ty mañeva, am-pivazohoa’i Talè, vaho am-pahaisaha’ondatio; vaho nampindreze’ay am’iereo ty rahalahy beteke niventè’ay naho nioni’ay t’ie maringatse amy ze he’e, mentsake henaneo te mampahimbañ’aze ty fatokisa’e anahareo. Le i Titosy, Mpirekets’amako naho mpifanehake ama’areo; naho o roahalahio, ie nampihitrife’o fivorio, enge’i Norizañey. Aa le aboaho am’iereo aolo’o Fivorio ty ventem-pikokoa’areo naho ty talim-pirengea’ay anahareo.

Misoratra ao amin'ny gazety anay

Apetraho ny Église Locale