Kolosia 4

O rotompoo, anò an-katò naho hamiràñe o mpitoro’areoo fohiñe te aman-Talé andindìñe ao ka nahareo. Mitoloña an-kalaly, mijilova ama’e, le mañandriaña; naho mihalalia ho anay, hisokafan’Añahare lalañe i tsaray, hitaroña’ay i mietake amy Norizañeiy, ze maha am-bahorañ’ahiko; t’ie halange, hahafitaroñako ami’ty evà’e. Mañaveloa an-kihitse amo alafeo, rombaho ty andro. Ampanintsiño nainai’e ty saontsi’areo vaho hafirio an-tsira, hahafohina’areo ty hanoiñe ze ondaty. Aa naho ty amako, le hitalilia’i Tikiko, rahalahy kokoañe naho mpitoroñe migahiñe vaho mpitrao-pitoroñe amy Talè. Ie ty nahitriko, hitalily anay ama’areo vaho hañohò ty arofo’areo. Hindre ama’e ty Onesimosy, rahalahy migahiñe naho kokoañe, toe mpiama’areo. Ho talilie’iareo ze he’e atoy. Salamae’i Aristarko mpitrao-silisily amako, naho i Marka, longo’i Barnabasy (toe nahazoa’areo lily, rambeso t’ie pok’ao), naho Iesose atao ty hoe Josto. Iereo avao ty boak’amy savatsey amo mpifanehake amako ho amy Fifehean’Añahareio naho toe mpañosik’ahiko. Salamae’i Epafra, i boak’ama’areoy, i toe mpitoro’Iesoà Norizañey naho mahimbañe nainai’e an-kalaly ho anahareo, hijadoña’areo, fonitse am-patokisañe heneke amo hene satrin’Añahareo. Le itaroñako t’ie mahimbañe ho anahareo naho ho a i Laodikia vaho i Hierapolia. Salamae’i Lioke mpanaha ìsoke naho i Demasy. Salamao o roahalahy e Laodikia añeo naho i Nimfae naho i Fivory añ’anjomba’ey. Ie vinaky ama’areo ty taratasy toy, le ampamakio ty Fivory e Laodikia añe ka vaho vakio’areo i amy Laodikiay. Le saontsio amy Arkipo ty hoe: Ehe tomiro i fitoloñañe rinambe’o amy Talè y hañenek’aze. Aman-tañako ty añontaneako, Izaho, Paoly. Tiahio o rohikoo. Fañanintsiñe ama’areo.

Misoratra ao amin'ny gazety anay

Apetraho ny Église Locale