Kagày 1

Tamy taom-paha-roe’i Dariavese mpanjakay, amy volam-paha-eneñey, amy valoha’i volañey, le niheo amy Zerobabele ana’i Sealtiele mpifehe’Iehodà naho am’Iehosoa ana’Iehotsadake mpisorombey ty tsara’Iehovà añamy Kagày mpitokiy, nanao ty ti-hoe: Hoe ty nafè’Iehovà’i Màroy, Manao ty hoe ondaty retoañe, Mboe tsy tondroke i àndroy, ty andro hamboareñe ty anjomba’Iehovà. Niheo eo amy zao añamy Kagày mpitokiy ty tsara’Iehovà nanao ty hoe: Sam-piagaregaña’areo amo akiba’areo soa tinemetseo hao henaneo, ie mangoakoake ty anjomba toy? Aa le hoe ty nafè’Iehovà’i màroy, Itsakoreo o sata’areoo: Bey ty tinongi’areo fa kede ty nivokareñe; mikama fe tsy ànjañe; minoñe fe tsy etsake; misikiñe fe tsy mafana; vaho mandrambe tambe an-koroñe loadoake ty mpitoroñe. Hoe ty nafè’Iehovà’i Màroy, Vetsevetseo o sata’areoo. Mionjona mb’amy vohitsey mb’eo naho añandeso hatae le amboaro i anjombay hahafale ahy, hahazoako engeñe, hoe t’Iehovà. Mipay maro nahareo fe tsy ampeampe ty oniñe; ie endese’areo moly le tiofeko añe. Akore arè? hoe t’Iehovà’i Màroy: Toe napoke ho kòake i kivohokoy, ie songa milay mb’añ’akiba’e mb’eo. Toe ie ty añajà’i likerañey zono, naho itambozora’i taney havokarañe. Nitokavako hasalikoañe ty tane toy naho o vohitseo naho o vare-boleo naho o divaio naho o menakeo naho o famokara’ty tane toio, naho ondatio naho o hareo vaho ze fonga fitoloñam-pitàñe. Aa le jinanji’i Zerobabele, ana’i Sealtiele, naho Iehosoa, ana’Iehotsadake, mpisorom-bey, naho ze sehanga’ondaty iaby ty fiarañanaña’Iehovà Andrianañahare’iareo naho o tsara naboa’i Kagày mpitoky, namantoha’Iehovà Andrianañahare’iareoo, vaho nañeveñe am’Iehovà ondatio. Le nitaroñe’i Kagày ira’Iehovà am’ondatio ty nafe’Iehovà: Ama’areo iraho, hoe t’Iehovà. Nitroboe’Iehovà amy zao ty arofo’i Zerobabele, ana’i Sealtiele, mpifele’Iehodà naho ty arofo’Iehosoa, ana’Iehotsadake, mpisorom-bey naho o tro’ondaty sehanga’e iabio, Vaho niheo mb’eo nitoloñe amy anjomba’Iehovà’i Màroy, Andrianañahare’iareoy, amy andro faha-roapolo-efats-ambi’i volam-pah-ene’i taom-paharoe’i Dariavese mpanjakaiy.

Misoratra ao amin'ny gazety anay

Apetraho ny Église Locale