Bentatse 19

Añe irezay le tsinanoko ty fipoñafam-peom-balobohòke andindìñe ao, nirihoñe ty hoe: Haleloia! Fandrombahañe naho enge, naho haozarañe ho an’Andrianañaharen-tikañe amy te mahity naho vantañe o fizakà’eo, le fa nafà’e i tsimirirañe jabajaba nandeotse ty tane toy amo hakarapiloa’eoy vaho navale’e ama’e ty lio’o mpitoro’eo. Nindrai’iereo ty hoe: Halelo-Ia! Hihobobòke nainai’e donia o hatoe’eo. Songa nibaboke naho nitalaho aman’Andrianañahare mpiambesatse amy fiambesa’ey i androanavy roapolo-efats’amby rey naho i raha veloñe efatse rey, nanao ty hoe: Amena, Haleloia! Le niboak’amy fiambesatsey ty fiarañanañañe nanao ty hoe: Rengeo t’i Andrianañaharen-tikañe ry mpitoro’e iabio, naho o mañeveñe ama’eo, ndra ty kede ndra ty bey! Tsinanoko amy zao ty nanahake feom-balobohòke, nanahake ty fitroña’ty rano misorotombake naho nanahake ty fiparapapiahan’àmpiñe ra’elahy, nanao ty hoe: Haleloia! Fa mifehe t’i Talè Andrianañahare, Tsitongerèñe. Antao hifale naho hirebeke vaho hanolots’engeñe ama’e! Fa tsatoke ty enga-vao’i Vik’añondriy, vaho fa nihamiñe i enga-vao’ey, le natolotse aze ty hiombea’e leny marerarera mikinokinoke mitoratsike. Toe o satan-kavañona’o noro’eoo i leny marerareray. Le hoe re tamako: Patero: Haha o ambarañe ho mb’amy sabadidam-panambalia’i Vik’añondriio! Le hoe re amako: Tsara ton’Añahare izay. Le nibabok’am-pandia’eo iraho niambane. Fe hoe re: Mitaoa! Mpitrao-pitoroñe ama’o naho amo longo’o mitañe ty taro’Iesoào iraho. Mitalahoa aman’Añahare! Amy te arofom-pitokiañe ty fitaroñañe Iesoà. Le naheoko te nisokake i likerañey naho niheo mb’etoa ty soavala foty, naho kanjieñe ty hoe Migahiñe naho To i mpiningitse ama’ey naho an-kavantañañe ty fizaka’e vaho fialia’e. Hoe afo misotratràke o fihaino’eo, naho sabakam-bolonahetse maro ty añambone’e eo. Sinokitse ama’e ty tahinañe tsy fohi’ondaty naho tsy ie. Misikin-damba mireparepa nalipotse an-dio re, le atao Tsaran’Añahare i tahina’ey. Nañorik’aze an-tsoavala foty o lahin-defon-dikerañeo nisaron-deny marerarera mitoratsike mikinokinoke. Miakats’am-palie’e ty fibara masioñe hañatsake o kilakila ondatio, le ho fehè’e an-kobay viñe. naho ie ty mandialia ty fipiritan-divaim-piforoforon-kaviñeran’Añahare, Tsitongerèñey. Misokitse an-tsaro’e eo naho am-pe’e eo ty hoe: Mpanjakam-panjaka naho Talèn-talè. Le naheoko ty anjely nijohañe amy àndroy nikoike am-piarañanañañe mafe amy ze hene voroñe mitiliñe an-teñanteñan-dikerañe ty hoe: Mb’etoy, mitontona amy sabadidake jabajaban’Añaharey, hitimpoñe ty nofom-panjaka, naho ty nofo’o mpifehen-dahin-defoñeo naho ty nofo’o fanalolahio naho ty nofon-tsoavala naho o mpiningitse ama’eo naho ty nofo’ze hene ondaty, ty ondevo naho ty midada, ty kede vaho ty bey. Le nitreako te nifanontoñe hialy amy miningitse soavalay naho amy firimboña’ey i bibiy naho o mpanjaka’ty tane toio naho o fifañosoña’iareoo. Le tsinepake i bibiy naho nindre ama’e i mpitoky sare’e nanao viloñe tsitantane añatrefa’e naho namañahy o nandrambe ty vilo’i bibiy vaho nitalaho amy sare’eioy. Navokovoko veloñe amy antara mirebareba afo manodotse solifaray ao ie roe, le vinono amy fibara miakatse am-palie’i mpiningitse soavalaiy o ila’eo, vaho nahaetsake o voroñe iabio ty nofo’iareo.

Misoratra ao amin'ny gazety anay

Apetraho ny Église Locale