Zekarià 7

Aa ie tan-taom-paha-efa’i Dariavese mpanjakay, le niheo amy Zekarià ty tsara’Iehovà amy andro fahefa’ty volam-pahasivey, toe Safary; Ie nampañitrifeñe añ’anjomba’Iehovà ao t’i Sarezere naho i Regemeleke rekets’o mpiama’eo, ninday saontsy amo mpisoroñe añ’anjomba’Iehovà’i maro io, naho amo mpitokio, ami’ty hoe: Handala hao iraho amy volam-paha-limey, naho hilie-batañe manahake i nanoeko amy taoñe maro rezaiy? Aa le niheo amako ty tsara’Iehovà nanao ty hoe: Saontsio ze hene’ondati’i taney naho o mpisoroñeo, ty hoe: Ie nililitse naho nandala amy volam-paha-limey naho amy volam-paha-fitoy, i fitompolo taoñe rezay, Izaho hao ty nililira’areo; Toe amako hao? Ie mikama, naho minoñe, tsy ho anahareo hao ty fikama’areo naho ho anahareo ty finoma’areo? Tsy izay hao o tsara tsinei’Iehovà añamo mpitoky taoloo, ie nimoneñañe t’Ierosalaime naho niraorao, ie naho o rova’nañohok’azeo, vaho nitobohañe ka i Atimoy naho i Vavataney? Niheo amy Zekarià ty tsara’Iehovà, nanao ty hoe: Hoe ty nitsarà’Iehovà’i Màroy: Manoa zaka-to naho songa mifampitretreza naho mifanao miroahalahy; ko mamorekeke vantotse, ndra bode-rae, ndra renetane, ndra o rarakeo: ko mifampikinia an-troke. F’ie nifoneñe tsy hañaoñe, naho nampitolike soroke mandietse, vaho nanjenjen-dravembia tsy hitsanoñe; mbore, nanoe’iereo vato mizitse ty tro’iareo tsy mone hahajanjiñe i Hake, naho o tsara nampisangitrife’Iehovà am-pità’o mpitoky taoloo añamy Arofo’ey; aa le nifetsake eo ty haviñerañe jabajaba’Iehovà’i Màroy. Ie amy zao, kanao nikanjy re naho tsy nañaoñe iereo, le hikanjy ka iereo vaho tsy ho haoñeko, hoe t’Iehovà’i Màroy; le nampibaratsiahako an-tangololahy iereo mb’amo kilakila ondaty tsy apota’iareoo. Le nihòake i taney nenga’iereo, naho leo raike tsy nihelohelo ama’e; ie nampangoakoàhe’iereo i tane fanjàkay.

Iscriviti alla nostra newsletter

Installa Église Locale