Mpanjaka II 22

Valo taoñe t’Iosià te namototse nifeleke, vaho nifehe telopolo taoñe raik’amby e Ierosalaime ao. Iedidae, anak’ampela’i Adaià nte-Bots’kate, ty tahinan-drene’e. Nanao soa am-pivazohoa’Iehovà re naho nañavelo an-tsata’i Davide rae’e vaho tsy nitsile mb’an-kavana ndra mb’ankavia. Ie amy taom-paha-folo-valo-ambi’Iosià mpanjakay, le nampihitrife’i mpanjakay t’i Safane, ana’i Atsaliaho ana’i Mesolame mpanokitse mb’añ’anjomba’Iehovà mb’eo, ami’ty hoe: Akia mb’amy Kilkià mpisoroñe hamolily o volafoty fa nasese añ’anjomba’Iehovà o, o natonto’o mpañambin-dalambeio am’ondatioo; le ampanesefo am-pità’o mpanao i fitoloñañeio, amo mpisary i anjomba’Iehovà io; le hatolo’iereo amo mpifanehak’añ’anjomba’Iehovà o hamboareñe o vakivaky amy anjombaio; amo mpandranjio, naho amo mpamboatseo naho amo mpandranjy vatoo naho hiviliañe hatae naho vato pinèke hampisomontieñe i anjombay, vaho tsy ampivolilieñe o tolorañe i drala am-pitañeio, amy te matoe ty fitoloña’iareo. Le hoe t’i Kilkià, mpisoroñe, amy Safane, mpanokitse; Nitreako añ’anjomba’Iehovà ao ty boke Hake. Le natolo’i Kilkià amy Safane, vaho vinaki’e. Nimb’amy mpanjakay mb’eo t’i Safane mpanokitse vaho nahere’e amy mpanjakay ty saontsy manao ty hoe: Fa natonto’o mpitoroñeo o drala niisak’añ’anjombao vaho natolo’iereo am-pità’o mpitoloñe misary ty anjomba’Iehovà o; le tinaro’i Safane amy mpanjakay ty hoe: Nanese boke amako t’i Kilkia mpisoroñe. Aa le nivakie’i Safane añatrefa’i mpanjakay. Ie jinanji’i mpanjakay ty enta’i boke Hakey, le rinia’e o saro’eo; le linili’i mpanjakay t’i Kilkia mpisoroñe, naho i Akikame, ana’i Safane naho i Akbore ana’i Mikaià naho i Safane mpanokitse vaho i Asaià mpitoro’i mpanjakay ami’ty hoe: Akia, añontaneo am’Iehovà ho ahy naho ondatio naho Iehoda iaby o tsara’i boke nioniñeio, fa akore ty haviñera’Iehovà misolebotse amantika, ie tsy hinaon-droaen-tika o tsara ami’ty boke toio; hera fonga hanoe’e aman-tikañe o sinokitseo. Aa le nimoak’amy Koldàe mpitoky ampela, vali’i Salome, ana’i Tikvà, ana’i Karkase mpañambin-tsikiñe, mpimoneñe e Ierosalaime an-kibohom-panokiram-boke ao, t’i Kilkià mpisoroñe naho i Akikame, naho i Akbore naho i Safane vaho i Asaià, le nifañaoñe ama’e. Le hoe re am’iereo, Hoe t’Iehovà Andrianañahare’Israele, Saontsio indaty nañirak’anahareo amakoy, Hoe ty tsara’Iehovà: Mahaoniña te hametsahako hankàñe ty toetse toy naho o mpimoneñe ama’eo; toe ze hene enta’i boke’vinaki’i mpanjaka’Iehoday; amy te naforintse’iereo iraho naho nañenga aman-drahare ila’e, hanigike ty haviñerako amo satam-pità’iareoo; aa le hisolebotse ami’ty toetse toy ty haviñerako vaho tsy hakipeke. Fe hoe ty ho saontsieñe amy mpanjaka’Iehodà nañirak’anahareo hañontane amy Iehovà y: Hoe t’Iehovà, Andrianañahare’Israele: ty amo tsara inanji’oo, kanao mitrotrotrotro ty arofo’o naho nireke añatrefa’Iehovà, ie jinanji’o i vinolako ami’ty toetse toiy naho amo mpimone’eo, t’ie ho fatra naho fatse, vaho te rinia’o o saro’oo vaho nirovetse añatrefako; le toe tsinanoko irehe, hoe t’Iehovà. Aa le oniño te hatontoko aman-droae’o irehe, le hambineñe an-kibori’o ao an-kanintsiñe, vaho tsy ho isam-pihaino’o ty hankàñe hafetsako ami’ty toetse toy. Aa le nahere’iareo amy mpanjakay i entañe zay.

Iscriviti alla nostra newsletter

Installa Église Locale