Marka 13

Ie niavotse i Anjomban’Añaharey, le hoe ty mpiama’e raike: O Rañandria, anh’a anh’a! hehek’o vato jabajabao, o anjomba fanjàkao! Tinoi’Iesoà ty hoe: Isa’o hao o anjomba fanjàka roañeo? Leo vato’e raike tsy hapoke ambone’ty ila’e ze tsy hafetsake ambane. Ie niambesatse am-bohi-Oliva, tandrife i Anjomban’Añaharey, le natola’i Petera naho Iakobe naho i Jaona naho i Andrea vaho nañontanea’iareo ty hoe: Atalilio: ombia te ho tondroke o raha zao? Inoñe ty ho viloñe t’ie ho heneke? Le namototse nitalily am’iareo ty hoe t’Iesoà: Mitaoa tsy ho verevereñe; maro ty hiboak’ami’ty añarako hanao ty hoe, Izaho ro ie, hampandifike ty maro. Le ie janji’areo amo ali-taneo naho o talilin’alio, ko mahimahiñe, amy t’ie tsy mete tsy ho avy, fe mbe tsy ie i figadoñañey. Hiongake hifañatreatre ami’ty fifelehañe ty fifelehañe, naho ami’ty fifeheañe ty fifeheañe, naho hiezeñezeñe ty tane ila’e añe, vaho ho paohe’ty hasalikoañe; ty fifotoram-pitsongoan’ampela avao irezay. Aa le mitaoa, fa hasese’iereo am-pivory ao, naho ho fofoheñe am-pitontonañ’ao, vaho hajohañe añatrefam-pandily naho mpanjaka eo ty amako ho fitaliliañe ama’e. Fa tsy mete tsy taroñeñe amy ze kilakila ondaty hey i talili-soay. Aa ie tantalieñe naho seseheñe, ko mimenomenoñe amy ze ho saontsie’areo, le ko mañereñere aolo; fe saontsio ze hatolotse amy ora zay, amy te tsy inahareo ty hisaontsy, fa i Arofo Masiñey. Hasesen-drahalahy ty rahalahi’e havetrake, le ty rae i ana’e, naho hiongake aman-droae’e o ana’eo hañoho-doza ama’e. Kila halaiñe anahareo ty ami’ty añarako, fe ho rombaheñe ty mahafeake pak’am-para’e. Aa naho vazoho’areo mijagarodoñe amy tsy mete ijohañañey ty Hativà’o Fandrotsahañeo, (ehe te mahaoniñe ty mpamaky); le miherereaha an-day mb’am-bohitse mb’eo ze hene e Iehodà ao; Asoao tsy hizotso ty ambone’anjomba eo himoake añ’akiba ao hañakatse raha. Asoao tsy hibalike handrambe ty sarimbo’e ze an-teteke añe. Feh’ohatse ho amo mivesatse naho mampinono amy andro rezaio! Le mihalalia te tsy ho ami’ty asotry ty hifetsaha’e. Fa ho sam-poheke mboe tsy nizoeñe an-tane atoy sikal’ami’ty fifotora’ty voatse namboaren’Añahare toy pake henane vaho tsy ho ama’e ka—i andro rezay. Aa naho tsy nampitomots’andro t’i T alè, le tsy ho nitendreke nofotse ho rombaheñe; fe o noro’e jinobo’eo ro nañatomora’e i andro rey. Ie amy zao, naho eo ty hanao ama’areo ty hoe: Hehe, ingo i Norizañey; naho, Hehe, inge! Ko miantoke, amy te hiongake o norizam-bìlañeo, naho o mpitoky sare’eo, hampiboake viloñe vaho halatsàñe handrantoa’e o jinoboñeo naho ho nimete. Aa le itaò: Ingo fa hene nataliliko ama’areo aolo. Ie amy andro rezay, naho fa añe i san-kaemberañey, le hampaieñeñe i àndroy, naho tsy hañomey ty hazavà’e i volañey, naho hirarake o vasian-dikerañeo, vaho ho ozoñozòñeñe o haozarañe andindìñeo. Vaho ho isa’iereo mitotsake amo rahoñeo ey an-kaozarañe naho engeñe ra’elahy i Ana’Ondatiy. Le hahitri’e mb’eo o anjeli’eo, hanontoñe o jinobo’eo boak’ami’ty fihirifa’o tiok’efatseo, sikala añ’olo’ty tane toy añe pak’añ’indran-dikerañe añe. Rendreho ty razañe’o sakoañeo: Ie fa maleme ty lengo’e, naho mibotiboty o rave’eo, le fohi’areo te miha-asara ty taoñe. Hoe izay ka nahareo, ie maharendreke ty fifetsaha’irezay; fohino te mitotoke, vaho fa an-dalam-bey eo. Eka! to t’itaroñako te tsy himosaoñe añe ty fifokoañe toy naho tsy tendreke hey irezay. Hisaok’añe i likerañey naho ty tane toy, fa tsy hihelañe ka o volakoo. Aa ty amy àndroy naho i ora zay, tsy ia ty mahafohiñe ndra o anjely andindìñeo ndra i Anakey, fa t’i Rae avao. Mitaoa, mijilova; amy te tsy fohi’areo ty hitondroha’i àndroy. Razañeñe amy t’indaty nañavelo añe; ie nienga ty anjomba’e, naho tinolo’e lily o mpitoro’eo, naho songa nizarae’e fitoloñañe, vaho namantok’amy mpigarin-dalambeiy te hijilojilo. Aa le mitaòa, amy te tsy fohi’areo ty hibaliha’i talèn’anjombay, ke hariva, he antets’ale, kera amy kekeon-akohoy, hera maraindray; tsy mone hitojeha re hanjò anahareo mirotse. O itaroñakoo ro taroñeko amy ze hene ondaty: Mitaoa!

Iscriviti alla nostra newsletter

Installa Église Locale