Kolosia 3

Aa kanao nindre nitroatse amy Norizañey nahareo, imaneo pay o raha amboneo, amy iambesara’i Norizañey am-pitàn-kavanan’Añaharey. Tsakoreo o raha an-dikerañeo, fa tsy o an-tane atoio. Nivilasy nahareoo, le fa nahaja amy Norizañey aman’Añahare ao ty fiai’areo, Naho miboake i Norizañey, ie havelo’o, le hiboake mindre ama’e an’engeñe ka nahareo. Vonò arè o fangen-kaondati’ty tane toy ama’oo; ze hakarapiloañe, fandratoañe, filomolorañe, fitsikirihan-draty, vaho fihàñañe—ie fiatoañe am-pahasive; irezay ty hifetsaha’ty fifombon’Añahare amo anam-panjeharañeo. Ie nañaveloa’areo te mbe niveloñe ama’e, fe apitsoho añe henaneo, fonga tsy aboak’am-palie’areo ty heloke, ty fifombo, ty inje, ty teratera, naho ty reha-timbo. Ko mifandañitse, fa naitoa’areo i haondaty hambo’ey rekets’o sata’eo, le fa natseta’areo t’indaty vao, ze mihavao erike am-paharendrehañe mihafonitse, mihahambam-bintañe amy Namboats’azey. Tsy te Grika ndra Jiosy, sinavatse ndra tsy sinavatse, ambahiny ndra sadiavahe, ondevo ndra midada, fe halifora’e i Norizañey, ie ama’e iaby. Aa kanao jinobon’Añahare nahareo, miavake naho kokoañe, sikino ty arofo miferenaiñe, matarike, mirèke, trentrañe, naho mahaliñe, mifampivavea naho mifampihevea, ie eo ty aman-kabò ama’ia’ia, le mifampihevea hambañe amy nañahà’i Talè anahareoy. Lombolombo’irezay ty fikokoañe, ie mamahotse am-pitraofan-kina fonitse. Ehe ho fehè’ty fañanintsi’i Norizañey o arofo’areoo fa izay ty nikanjiañe anahareo ho fañòva raike: vaho mañandriaña. O tsara’i Norizañeio abey ty himoneñe ama’areo ao ami’ty halifora’e; mifañòha naho mifanoroa añ’ampon-kihitse; misaboa sabo, naho beko naho takasy miavake, mañandriañ’an’Andrianañahare añ’arofo. Aa le ndra inoñ’inoñe anoe’areo, ke an-tsaontsy he sata, le ami’ty tahina’i Talè Iesoà, vaho mañandriañ’an’Andrianañahare Rae añama’e. Ry roakembao, miandalia amo vali’areoo, ami’ty eva’e amy Talè. Ry lahilahio, kokò o vali’areoo fa tsy itorifihañe. Ry ajajao, mivohora aman-droae amy ze he’e, fa izay ty no’i Talè. Ry aba, ko mañìnje anake, hera hahamòhake aze. Ry mpitoroñeo, mivohora amy ze he’e amo tompo’areo amo haondati’eo, tsy t’ie misamba hipaia’o tsiriry, fa an-tso-tro mañeveñe amy Talè, aa ndra inoñe o tolon-draha’oo, ihembaño, hoe mpitoro’i Talè fa tsy ondaty, le fohino t’ie ho tambeze’i Talè amy lovay, amy te Iesoà Talè ro toroñe’areo. Ho valeañe ty amo sata-rati’eo ka o lo-tserekeo fa tsy irihiañe.

Iscriviti alla nostra newsletter

Installa Église Locale