Jaona 2

Ie tongoa’ty herone le tondroke e Kana e Galilia añe ty enga-valy naho teo ty rene’Iesoà vaho songa nañambaràñe homb’amy enga-vaoy t’Iesoà naho o mpiama’eo. Ie ho nikapioke ty divay le hoe i rene’Iesoà ama’e: Tsy aman-divay iereo. Tinoi’Iesoà ty hoe: O Rakembao, inoñ’ama’o naho amako izay? Mbe tsy tsatoke ty orako. Fe hoe ty nafanton-drene’e amo mpitoroñeo: Anò ze ampanoa’e. Nidoñe marine eo ty sajoa vato eneñe, fañaliova’o Jiosio, songa nahaatseke fañaranañe telo ndra roe. Hoe t’Iesoà tam’iareo: Atsafo rano o sajoao. Le nipeà’iereo pak’an-tsoñi’e. Le hoe re tam’iereo: Anovizo henaneo vaho endeso amy talèn-engay. Le nandesa’iareo; aa naho nitsopeke i rano niova ho divaiy i talèn-tsabadidakey, ie tsy napota’e ty nihirifa’e, fa o mpitoroñe nanovy i ranoio avao ro nahafohiñe, le kinanji’i talen-tsabadidakey i mpañengay vaho nanoa’e ty hoe, Fanjotso’ondatio aolo ty divay soa, ie nikamaeñe, vaho izay ty masay; fa ihe ka nañaja ty divay soa ampara henane. Izay ty lengom-bilo’Iesoà nanoe’e e Kana’i Galilia añe, nampiboake ty enge’e naho nampiantofa’e o mpiama’eo. Ie modo izay le nizotso mb’e Kapernaome mb’eo, ie naho i rene’e naho o rahalahi’eo vaho o mpiama’eo, le nitoetse ao andro tsy ampeampe. Ie an-titotse i Fihelañ’ambone’o Jiosioy, le nionjomb’e Ierosaleme añe t’Iesoà. Naho nizoe’e an-kiririsan’anjomban’Añahare ao o nandetak’añombe naho añondry naho dehoo, vaho o mpampikalo dralao mitoboke ey. Aa le namboare’e firison-kafotse naho fonga sinoi’e hiakatse i anjombay mindre amo añondrio naho o añombeo, le nalonga’e o dralam-pampikalo dralao vaho navalihoho’e o talatalao, le hoe re amo mpandetake dehoo: Akaro añe o rahao vaho ko anoeñe kibohon-kilankañe ty anjomban-dRaeko. Le nitiahi’o mpiama’eo i pinatetse, ty hoe: Nampibotsek’ahy ty fahimbañako amy anjomba’oy. Tinoi’o Tehodao ty hoe: Inoñe ty viloñe hatoro’o anay, te ihe manao o raha retiañe? Natoi’Iesoà ty hoe: Rotsaho ty anjomba toy le hatroako añate’ty telo andro. Aa le hoe o Tehodao: Efapolo eneñ’amby taoñe ty namboareñe ty anjomba toy, vaho hatroa’o añ’ate ty telo andro? Fa i akibam-pañova’ey ty nienta’ey. Aa ie nivañom-belon-dre le nitiahi’o mpiama’eo i tsinara’e am’iereoy; le natokisa’iareo o Sokitse Masiñeo naho ty entañe nisaontsie’Iesoà. Ie te Ierosaleme ao amy Fihelañey, le maro ty niantoke i tahina’ey te nahaisake o raha tsitantane nanoe’eo. F’ie tsy nampivave’Iesoà, amy te kila arofoana’e ondatio; vaho tsy nipay mpitalily ondaty, fa arofoana’e ze am’ondatio.

Iscriviti alla nostra newsletter

Installa Église Locale