Marka 9

Tinovo’e am’iereo ty hoe: Eka! to t’itaroñako te amo mijohañe etoañeo o tsy hitsope-kavilasy ampara’te isa’e mitotsake ami’ty haozara’e i Fifehean’Añahareio. Ie añe ty eneñ’andro, le nente’Iesoà t’i Petera naho Iakobe vaho i Jaona nañambone vohitse abo mb’eo, nitolake, ie novaeñe aolo’iereo eo. Nireandreañe ty saro’e; nifoty mangotritriake hoe volovaso, hafotiañe tsy lefem-pikotriñe an-tane atoy. Nisodehañe am’iereo t’i Elia naho i Mosè, vaho nifanaontsy am’Iesoà. Hoe t’i Petera tamy Iesoà: O Raby, fanjaka ty maha etoañe itika; apoho hamboara’ay kivoho telo: ty ho Azo, ty ho a i Mosè, vaho ty ho a i Elia; fe tsy napota’e i nisaontsie’ey, fa nirevendreveñe. Le niboake eo ty rahoñe nañaloke iareo, vaho niboak’amy rahoñey ty fiarañanañañe, nanao ty hoe: Anako kokoako itoy: Ijanjiño. Tsipaepae izay, nañente iereo fe tsy nahaisake ia’ia am’iereo naho tsy Iesoà avao. Ie nizotso i vohitsey, le hinatahata’e tsy hitalily aman-dra ia’ia i niisa’iareoy ampara’te vañom-beloñe i Ana’Ondatiy. Nahaja’iereo an-troke ao i tsara zay vaho nifañontane i tsaraeñe hoe: Fivañonam-beloñey. Le nañontanea’iareo ty hoe: Akore ty fisaontsi’o mpanoki-dilio te tsy mahay tsy ho avy aolo t’i Elia? Hoe ty natoi’e: Toe avy aolo t’i Elia hañavao ze he’e; fe akore i nipatereñe i Ana’Ondatiy t’ie tsy mete tsy silofen-draha maro vaho sirikaeñe? Fe itaroñako, toe niavy t’i Elia, le nanoeñe ama’e ze nisatrie’iereo, hambañe amy nipaterañey. Nimpoly mb’amo mpiama’eo mb’eo iereo le nahaisake t’ie niarikoboña’i lahialeñey, naho nanoa’o mpanoki-dilio lie-drokoñe. Ie hene nahaisak’aze i valobohokey le nilatsa vaho nivavatse mb’ama’e mb’eo hifañontane. Le hoe ty ontane’e am’iereo: Inoñe o ifandiera’areoo? Hoe ty natoi’ty boak’amy màroy ao: O Rañandria, nenteko mb’ama’o ty anako niazo’ty kokolampa mahagiñe aze. Ie azi’e, le roterotè’e naho ampamore’e ty vava’e, ie mivazakota vaho mifimpìñe, aa naho nivolañeko o mpiama’oo ty hañary aze, tsy nilefe’e. Natoi’Iesoà ty hoe: Ry tariratse po-fatokisañeo, pak’ombia ty mbe hindrezako? Sikal’ombia ty mbe hifeahako? Ampombao mb’amako re. Aa le nasese’iereo mb’ama’e, ie nivazoho’e, le nifetsaha’i kokolampay an-tambioñe i ajalahiy; nikorovoke an-tane eo nitamborokoseke vaho namore. Le nañontanea’e an-drae’e ty hoe: Ombia ty nifotora’i fanjeke’ey? Le hoe ty natoi’e: Ampara’ty naha-kede aze. Beteke ahifi’e añ’afo ao naho an-drano ao hañohofa’e loza; aa naho mete’o ty hanao ndra inoñ’inoñe, iferenaiño vaho imbao! Hoe t’Iesoà tama’e, Naho mete! Toe hene mete ami’ty mpiato. Nitoreo amy zao ty rae’i ajalahiy ami’ty hoe: Miantoke iraho, imbao o tsy fatokisakoo. Naheo’Iesoà te hihipoke ama’e i lahialeñey le nendaha’e i anga-dratiy ami’ty hoe: Ty kokolampa giñe naho moañe tìañe, lilieko irehe, Iakaro le ko itsamoaha’o ka. Nikontsiañe amy zao re le nagibigibi’e mafe, naho niakatse vaho ni-hoe lolo i ajajalahiy kanao natao’i màroy te simba. Fe rinambe’Iesoà ty taña’e le sinotra’e vaho nitroatse re. Ie nizilike añ’anjomba ao le natola’o mpiama’eo, nañontane aze ty hoe: Akore te tsy nilefe’ay firoake i rahay? Hoe re tam’iareo: Tsy mete mifaoke i karazañe zay naho tsy aman-kalaly. Nienga iereo re le niranga i Galilia, fa laha’e te tsy ho fohi’ondaty, amy t’ie nañoke o mpiama’eo, naho nitaroña’e ty hoe: Fa nasese am-pità’ondaty i Ana’Ondatiy hañohofan-doza; ie vinono le hitroatse naho fa modo ty telo andro. Fe tsy napota’iereo i saontsy zay, naho tsy nahavany nañontane aze. Nigodañe e Kapernaome ao iereo, le ie añ’anjomba ao, nañontanea’e o mpiama’eo ty hoe: Inoñe i nisafirie’areo an-dalañey? Nianjiñe iereo, amy te nialy habey amy lalañey. Niambesatse re le kinanji’e i folo ro’amby rey naho nanoa’e ty hoe: Naho eo ty te ho valoha’e, ie ty ho tsitso’e vaho ho mpitoro’ie iabiy. Nandrambe ajaja re le navotra’e aolo’iareo eo naho nisazoha’e, vaho nanoe’e ty hoe iereo: Ndra ia ia mandrambe ty ajaja hoe toke ami’ty añarako mandrambe ahy, le ndra ia ia mandrambe ahy, tsy izaho ty rambese’e fa i Nañitrike Ahiy. Hoe t’i Jaona tama’e: O Rañandria, nitrea’ay ty nañary kokolampa ami’ty tahina’o, le nendaha’ay amy t’ie tsy mpañorike an-tika. Le hoe t’Iesoà: Ko sebañe’o, fa tsy eo ty hahaboa-kaozarañe ami’ty añarako ze mora hanirìka ahy. Ze tsy mirafelahy aman-tikañe ro mpiaman-tika. Aa ndra iaia manjotso rano am-pitovy hinoma’areo amy te a’i Norizañey, Eka! to t’itaroñako t’ie tsy ho motso-tambe. Fe ndra ia ia mampitsikapy ty raike amo mpiato kede retoa, hàmake t’ie androhizan-deom-bato am-pititia vaho avokovoko an-driake ao. Naho mamingañe azo ty fità’o, kitsiho añe, fa kitra’e hizilike an-kaveloñe ao dom-pitàñe ta t’ie havokovoko reke-tañan-droe mb’an-tsikeokeoke ao, amo afo tsy hay vonoeñeo— Lehe mahatsikapy azo ty fandia’o, aitò, fa hàmake hizilike an-kaveloñ’ao doñe irehe ta te hajoroboñe an-tsikeokeoke ao reke-pandia roe— Naho mañakeo azo ty fihaino’o, apolitiro, kitra’e himoak’am-Pifehean’Añahare ao tofa-pihaino raike irehe ta te hafetsake an-tsikeokeok’ao amam-pihaino roe, amo oletse tsy mateo naho amo afo tsy hay vonoeñeo— Toe kila ho siraeñ’afo, Soa o sirao, f’ie botsake i siray, inoñe ty hanirañ’aze? Manàña sira ama’areo ao, vaho mifampilongoa.

Suscribirse a nuestro boletín

Instalar Église Locale