Indra-Tsara 10

Hoe t’Iehovà amako henane zay: Amatsiho vato roe manahake i teo rey, le miañambonea mb’amako mb’am-bohitse atoy, vaho andranjio vata hatae. Ho sokireko amy ravem-bato rey i tsara tan-drave’e roe rey, i dinemo’o rey, le agodoño amy vatay ao. Aa le nitsenèko vata ami’ty mendoraveñe naho namatsihako vato roe hambañe amy teo rey, vaho niañambone’i vohitsey iraho nañotrotro i vato roe rey an-tañako. Le sinoki’e amy vato rey hambañe amy tsara sinokitse taoloy, i tsara folo nitseize’Iehovà ama’areo boak’añ’afo ao amy andro’i fivoriy rey; vaho natolo’Iehovà ahiko. Aa le nitolike iraho nizotso amy vohitsey, vaho najoko amy vata rinanjikoy i rave’e rey; ao iereo henaneo, amy nandilia’Iehovà amakoy. (Nañavelo hirik’e Birote-bene-iaakane pak’e Moserà o ana’Israeleo, le eo ty nihomaha’i Aharone, vaho ao ty nandentehañe aze; nandimbe aze ho mpisoroñe t’i Elazare ana’e. Boak’ao nañavelo mb’e Godgodà mb’eo iereo, le hirik’e Godgoda mb’e Iotbatà, tane fikararahan-torahañe.) Tamy andro zay le navahe’Iehovà ty fifokoa’i Levy ho mpitarazo i vatam-pañina’Iehovà y naho hijohañe añatrefa’Iehovà hitoroñe aze vaho hitata ami’ty tahina’e ampara’henane. Aa le tsy aman’anjara ndra lova amo rolongo’eo t’i Levy; Iehovà ro lova’e amy nitsara’Iehovà Andrianañahare’o ama’ey. Nitambatse am-bohitse ao efa-polo andro naho efa-polo halen-draho, manahake tam-baloha’ey. Le mbe nijanjiñe ahy amy andro zay ka t’Iehovà, le tsy nisatrie’Iehovà ty hanjamañe azo. Hoe t’Iehovà amako: Miongaha, akia, mionjona aolo’ondatio mb’eo, himoaha’iareo ao, hitavañe i tane natoloko an-droae’iareo am-pantay. Ie amy zao ry Israele, inom-bao ty ipaia’Iehovà Andrianañahare’o? Naho tsy ty hañeveñe am’Iehovà Andrianañahare’o, ty hañavelo amo lala’e iabio, ty hikoko aze naho ty hitoroñe Iehovà Andrianañahare’o an-kaampon’arofo naho an-kaliforam-pañòva, ty hiambena’o o lili’Iehovà o naho o fañè’e lilieko anito hahasoa azoo. Ingo a’Iehovà Andrianañahare’o i likerañey naho o andindin-dikerañeo, naho ty tane toy reketse ze he’e ama’e, fe nahafale Iehovà o roae’oo, nikokoa’e naho jinobo’e o tarira’iareo nifandimbeo: inahareo ‘nio, ambone’ze kila ondaty; le ie henaneo. Savaro arè ty ofon’arofo’areo, le ko manjehatse ka. Amy te Andrianañaharen-drahare naho Talèn-talè t’Iehovà Andrianañahare’areo; Andrianañahare jabahinake naho maozatse naho mampañeveñe; tsy mpirihy, tsy mandrambe vokàñe; omea’e to ty bode-rae naho ty vantotse, kokoa’e ty renetane, anjotsoa’e mahakama vaho tolora’e sikiñe. Aa le kokò o ambahinio, amy t’ie nirenetane an-tane Mitsraime ao ka. Mañeveña am’Iehovà Andrianañahare’o, ie avao ty italahoa’o naho ie ty vontitire’o vaho amy tahina’ey ty anoa’o fanta. Ie ty fandrengea’o, ie t’i Andrianañahare’o nahafonitse o raha fiaintane naho halatsàñe nanoe’e am-pahaisaham-pihaino’oo. Ondaty fitom-polo o roae’o nizotso mb’e Mitsraime mb’eoo, le hehe t’ie nampamorohote’Iehovà Andrianañahare’o hoe o vasian-dikerañeo.

Suscribirse a nuestro boletín

Instalar Église Locale