Fiantoñoñe II 17

Nandimbe aze nifehe t’Iehosafate anadahi’ey, le nihafatratse am’Israele. Nampipoha’e lahindefoñe iaby o rova-fatrats’Iehodao naho nampijadoña’e firimboñañe an-tane Iehoda ao vaho amo rova’i Efraime rinambe’i Asa rae’eo. Nindre am’Iehosafate t’Iehovà, amy te nañaveloe’e o sata’i Davide rae’e valoha’eo, le tsy pinai’e o Baaleo; nitsoeha’e t’i Andrianañaharen-drae’e, nañaveloe’e o lili’eo vaho tsy nanoe’e o sata’Israeleo. Aa le najado’Iehovà am-pità’e i fifeheañey; le ninday ravoravo am’Iehosafate t’Iehoda iaby ie nanam-bara naho engeñe ra’elahy. Le naonjoñe amo sata’Iehovà o ty arofo’e; mbore nafaha’e boake Iehoda ao o tambohoo naho o Aserào. Ie tan-taom-paha-telo’i fifehea’ey, le nirahe’e o roandria’eo, i Benekaile naho i Obadia naho i Zekarià naho i Netanele vaho i Mikaià hañoke amo rova Iehodao. Nindre am’iereo o nte-Levio; i Semaià naho i Netanià naho i Zebadià naho i Asahele naho i Semiramote naho Iehonatane naho i Adoniià naho i Tobiià vaho i Tobadonià, nte-Levy; nitraok’am’iereo t’i Elisamà naho Iehorame mpisoroñe, nañanatse e Iehodà ao, le am’iereo ty boke’i Hà’Iehovà; nitsitsihe’iereo o rova’Iehodà iabio, nañoke ondatio. Nivotrak’amo fonga fifeheañe naho tane mañohoke am’Iehodao ty firevendreveñañe Iehovà vaho tsy eo ty nialy am’Iehosafate. Nandesa’ty ila’o nte-Pelistio ravoravo naho haba am-bolafoty; ninday hare o nte-Arabeo: añondrilahy fito-arivo-tsi-fitonjato naho oselahy fito-arivo-tsi-fitonjato. Nitoabotse avao ty enge’Iehosafate; le namboare’e e Iehoda ao ty rova fatratse naho rovam-pañajàñe. Nimaro ty tolon-draha’e amo rova’Iehodao vaho inao o lahindefoñe, fanalolahy maozatse e Ierosalaimeo. Le zao ty famoliliañe iareo ty aman’anjomban-droae’e: am’Iehoda, o mpifelek’arivoo: i Adnà mpiaolo, reketse fanalolahy mahasibeke telo-hetse; nanonjohy aze t’Iehohanane mpiaolo reketse roe-hetse-tsi-valo-ale; nañorik’aze t’i Amasià, ana’i Zikrý, mpanolo-batañe ho am’Iehovà, fanalolahy maozatse roe-hetse ty tama’e; le amy Beniamine, i Eliada, lahindefo maozatse nahasibeke, reketse mpitàm-pale naho fikalandefoñe roe-hetse; le añ’ila’e t’Iehozabade reketse rai-hetse-tsi-valo-ale veka’e hialy. Irezay ro nitoroñe i mpanjakay mandikoatse o napo’e amo rova fatratse nanitsike Iehodào iabio.

Suscribirse a nuestro boletín

Instalar Église Locale